ग्राहक पंचायत महाराष्ट्र राज्य शाखा, कराडचा पद्नियुक्ती समारंभ संपन्न.

नवनिर्वाचित शहर अध्यक्ष नीतीन शहा यांचा रुग्ण मित्र चळवळ उभारण्याचा निर्धार

कराड : ग्राहक पंचायत महाराष्ट्र राज्य शाखा, कराडची पद्नियुक्ती समारंभ नुकताच संपन्न झाला. शहरातील बाबुभाई पदमसी हॉल येथे आयोजित या समारंभात ग्राहक पंचायत महाराष्ट्र राज्याच्या कोशाध्यक्षा सुनिताराजे घाटगे आणि कराड तालुका अध्यक्ष अधिकराव पाटील यांच्या शुभहस्ते नवनियुक्त पदाधिकाऱ्यांना नियुक्ती पत्रे प्रदान करण्यात आली. या कार्यक्रमात कराड शहर अध्यक्ष म्हणून नितीन शहा यांची निवड करण्यात आली.
या महत्त्वपूर्ण सोहळ्याला प्रमुख उपस्थिती म्हणून ग्राहक पंचायत सातारा जिल्हा सरचिटणीस नंदकुमार काटे आणि मोहनराव घनवट यांनी कार्यक्रमाची शोभा वाढवली. ग्राहक पंचायतचे अनेक पदाधिकारी यावेळी उपस्थित होते, कार्यक्रमाच्या सुरुवातीला नवनियुक्त पदाधिकाऱ्यांचे पुष्पगुच्छ देऊन स्वागत करण्यात आले. त्यानंतर, संयुक्तपणे दीपप्रज्वलन करून कार्यक्रमाची औपचारिक सुरुवात केली.
याप्रसंगी बोलताना सुनिताराजे घाटगे यांनी ग्राहक पंचायतच्या कार्याची माहिती दिली. त्यांनी सांगितले की, ग्राहक हक्कांचे संरक्षण करणे आणि ग्राहकांना त्यांच्या न्याय्य मागण्यांसाठी सक्षम करणे हे ग्राहक पंचायतचे प्रमुख उद्दिष्ट आहे. त्यांनी नवनियुक्त पदाधिकाऱ्यांना शुभेच्छा देताना आपल्या कार्यामध्ये निष्ठा आणि प्रामाणिकपणा ठेवण्याचे आवाहन केले. तसेच, ग्राहकांच्या समस्या सोडवण्यासाठी सदैव तत्पर राहण्याचे मार्गदर्शनही त्यांनी केले.
कराड तालुका अध्यक्ष अधिकराव पाटील यांनी आपल्या मनोगतात नवनियुक्त पदाधिकाऱ्यांचे अभिनंदन केले आणि त्यांच्या पुढील वाटचालीस शुभेच्छा दिल्या. त्यांनी कराड तालुक्यात ग्राहक पंचायतचे कार्य अधिक प्रभावीपणे कसे पुढे नेता येईल, याबद्दल विचार व्यक्त केले. तसेच, तालुका स्तरावर ग्राहकांच्या समस्या सोडवण्यासाठी नवीन योजना आणि उपक्रम राबविण्याची गरज त्यांनी प्रतिपादित केली.
कराड शहरचे नवनिर्वाचित अध्यक्ष नीतीन शहा यांनी आपल्या मनोगतात ग्राहक पंचायतचे कामकाज वाढवण्यासोबतच कराड शहरामध्ये रुग्ण मित्र चळवळ उभारण्याचा मनोदय व्यक्त केला. शहरातील रुग्णांना योग्य मार्गदर्शन मिळावे आणि त्यांच्या हक्कांचे संरक्षण व्हावे, यासाठी ही चळवळ उपयुक्त ठरेल, असे मत त्यांनी व्यक्त केले. तसेच शहरातील ग्राहकांच्या समस्या सोडवण्यासाठी नवीन योजना आणि उपक्रम राबवणार असल्याचे त्यांनी सांगितले.
या पद्नियुक्ती सोहळ्यामध्ये विविध क्षेत्रातील सामाजिक कार्यकर्त्यांचा आणि नागरिकांचा उत्स्फूर्त प्रतिसाद होता. नवनियुक्त पदाधिकाऱ्यांनी ग्राहक पंचायतच्या माध्यमातून समाजासाठी सक्रियपणे योगदान देण्याचा संकल्प व्यक्त केला.
कार्यक्रमाच्या सुरवातीस सहसचिव डॉ. धनंजय खैर यांनी उअपस्थितांचे स्वागत केले तर आभार प्रदर्शन हिरालाल खंडेलवाल यांनी.